Англійскі сусед

Задумалася, што гэта, магчыма, першая кніга балгарскага аўтара, якую я чытала. Балгарская вёска, дзе жывуць цікавыя і каларытныя жыхары. У кожнага свая гісторыя, кожнаму аўтар падарыў яркі і непаўторны вобраз, праўда, часам даведзены да крайнасці і карыкатурнасці. Думаю, балгарскіх чытачоў такое магло і пакрыўдзіць. Але аўтар добра ведае, што такое самаіронія. Жывуць у вёсцы даволі спакойна і аднастайна, але аднойчы іх спакой парушае сапраўдны англічанін, які вырашае збегчы ад шумнага гарадскога жыцця ў вёску. Купляе там дом, пачынае рамонт. Але не ў тую вёску ён сунуўся, ой не ў тую... Зусім іншымі ён уяўляў Балгарыю і яе насельнікаў. Яго спробы інтэграцыі ў балгарскае грамадства выклікаюць смех, а кожны з жыхароў хоча выкарыстаць англічаніна ў сваіх мэтах. Калі вы глядзелі фільмы Кустурыцы, то ведаеце, як выдатна ў яго атрымліваецца паказаць балканскі каларыт. Кніга Вешыма паводле атмасферы — гэта тыя ж фільмы Кустурыцы, толькі ў папяровым выглядзе і пра Балгарыю. Прыйдзецца даспадобы кніга і аматарам футбола: там мноства імёнаў, апісанняў футбольных матчаў, а адзін з герояў праз суд плануе змяніць сваё імя на Нотынгем Форэст, у гонар любімага футбольнага клуба. Кніга не вельмі аб'ёмная, з ёй можна прыемна правесці вечар, адпачыць і добра пасмяяцца.

Надышоў час падзяліцца смешнай кнігай.
Гэты твор сапраўды варты, каб пра яго гаварылі і паказвалі пабольш.
По на нашых паліцах не так і шмат беларускіх кніг з вясёлым сюжэтам. Але тут трэба ўставіць рэмарку, што гэта пераклад з балгарскай мовы.
І таму трэба яшчэ мець прафесіяналізм, каб у  перакладзе захаваць гумар і перадаць яго нашаму чытачу.

Міхаіл Вешым “ Англійскі сусед”.
Кніга пра тое, як англічанін, які ўсё жыцце пражыў у вялікім горадзе, на пенсіі купляе сабе дом у балгарскай вёсцы.
І як вы разумееце, ў вёску проста так са сваімі “парадкамі” не зайдзеш, і не важна ў Беларусі гэта вёска, ці ў Балгарыі.
Вось так і ўсе жыхары “Урадлівай” узбурыліся навіной пра новага суседа. А паколькі кожны вясковец меў свае адметныя рысы характару, то працэс адаптацыі ў англічаніна праходзіў весела і адметна.
Безліч кур’ёзных, месцамі бязглуздых момантаў, які склаліся ў цудоўную гісторыю.

Такую кнігу лёгка чытаць і прыемна ўспамінаць.