Забойства на вуліцы Макаёнка

Дальбог, у кожнага беларуса (нават памерлага) ушыты лічыльнік «сутак» сяброў і блізкіх. Ён пачынае цікаць у галаве ад моманту затрымання, нібы кухонны таймер. А потым бадзёрае «дзынь» звястуе, што зараз адчыняцца дзверы ізалятара.

— Паедзеш да мяне мыцца! — аўтарытарна абвесціў Аркадзь. — Бо, Якубік, пасля аднаго адматанага тэрміну цябе чакае яшчэ адзін сіметрычны, які матае кожны жыхар гэтага горада штолета, незалежна ад учыненых правінаў і ступені лаяльнасці кіроўнаму рэжыму. У вас з бабай Ханяй учора адключылі на чатырнаццаць сутак гарачую ваду!

— Сынку, сёння зранку я прыдумала новую духоўную практыку. Яна такая: чытаць «Ойча наш» кожны раз, калі бачыш, як па праспекце едзе аўтазак або бусік з зацямнёнымі шыбамі.

— Дапамагае?

— Ну, прынамсі, увесь дзень твая галава будзе занятая зграбнымі, бездакорнымі словамі, — адказала мама Стэфа, мая старая мама.

Камароўка, як заўжды, лечыць раны на сэрцы і душы шляхам яшчэ большага ачмурэння галавы, а наўзамен бярэ за гэта дурныя грошы.

Матчына сэрца — дастанае з маразільніка марожанае. Раней ці пазней растае.

З пэўных часоў жыхары здымаюць нумары кватэр, каб у выпадку візіту спецслужбаў у супрацоўнікаў органаў дадалося працы.

Плакат анансаваў «Першы ў гісторыі сусветнага баскетбола матч паміж прадстаўнікамі жаночай і мужчынскай зборнай РБ». Праз байкот сусветных федэрацый беларускі спорт меў намер заняцца перакрыжаваным апыленнем. Вынік гэтага матча быў ясны ад пачатку, бо ўсё ж баскетбалісты супраць баскетбалістак — гэта як мірны пратэст супраць амапаўцаў.

… музыкі сталі размаўляць міжсобку на вузкапрафесійныя тэмы: колькасць выпітага перад канцэртам…