Цитаты из книги Бір кем дүние

"Өлтіру оңай, тірілту қиын

Соттар қателесіп, кінәсіздерді өлімге бұйырады. Кінәсіз екені анықталғанда қайтадан тірілте алмайды. Не істеу керек? Бір кем дүние. "Халық жаулары" дегендердің көбі солай өлтірілді."

Қазақстан қайыршы болатындай сорлы емес. Оны сондай болуға мәжбүр етті.

... Мәңгілік ешнәрсе жоқ. Мәңгі тек Құдай ғана. "Бір Алладан басқаның бәрі өзгермек " (Абай).

"Жоғалған тіл

"Болашақ" деген шығып, бай балалары шет елде оқып, бірсыпырасы сол жақта қалады. Бірсыпырасы елге қайтады. Білімі жақсы, істі біледі. Бірақ тек орысша, иә ағылшынша сөйлейді. Қазақшасы жоқ. Бір кем дүние."

"Дәнек

Кейбір бастар ішінде дәнегі жоқ жаңғғаққа ұқсайды. Ондайлар көп қой. Бір кем дүние."

"Тым... тым...

Патшаға тым жақындама, Тым алыстап та кетпе. Ол да от сияқты: Тым жақындасаң - күйіп өлесің, Тым алыстасаң - үсіп өлесің. Бір кем дүние."

"Құнықпа

Алтын өзі тотықпайды, Адамдардың жанын тотықтырады. Бір кем дүние."

... Ораза тек ашығу емес.
Ораза - жақсы мінез қалыптастыру. Тәрбиелі тақуа болу.
Бір кем дүние.

"Жаманнан жақсы туады,
адам айтса нанғысыз.
Жақсыдан жаман туады,
бір аяқ асқа алғысыз."

Халық даналығы

- Балықтар да адамдар сияқты екен ғой. Ақылдысы бар, ақымағы да бар. Ақымағы көбірек пе, немене?..
Бір кем дүние.

Адамдар: "Уақыт өтіп барады", - деп өкінеді. Шынында өтіп бара жатқан уақыт емес, өмір өтіп барады.

Бәрін бір Алла біледі. Алла білімі шексіз. Білімі шектеулі адамдар. Бір кем дүние.

... Кейбіреулер туған жерінен жерісе, бұл да бір кем дүние. Тұғырына саңғыған сұңқар оңбас, Үйірінен безінген тұлпар оңбас.

Не істеу керек

"Сұлу әйел алған адам өмір бойы қарауыл болып өтеді. Бай әйел алған адам өмір бойы құл болып өтеді", - депті Баласағұн бабамыз. Бір кем дүние.

"Ақсақ Темірдің аманаты

Жалған дүниеден өтер алдында жарты әлемді жаулаған Әмір Темір жанындағыларға аманат айтты:

• Мен өлген соң жылап-сықтап, дауыс көтермеңдер. Оның түкке қажеті жоқ. Ажалды біреу айқайлап, қорқытып қуады ма екен? Киімдеріңді жыртып, жынды адамша жүгіргеннен гөрі Алладан "Аллаһу акбар" деп маған мейірім тілеңдер. Жүрегімді жылыту үшін "Фатиханы" оқыңдар.

" Қисық заң

Заң дегеніміз - өрмекшінің торы: әлсіздер тұтылып, әлділер құтылып кете береді. Бір кем дүние."

"Имансыз болма

Біреулерге Құдай бәрін береді. Байлық та бар, алтын, гауһар, інжу-маржан - бәрі бар. Төрт құбыласы сай. Бірақ Иман жоқ. Ең сорлы адам сол. Бір кем дүние."

"Ұятсыз болма

Адамға бала жастан ең керегі - Ұят деген қасиет. Ол туа бітеді. Бірақ кейбіреуі өсе келе, үлкейе келе ұяттан жұрдай болады. Бір кем дүние."

"Сарыала қаз

Жазушы Оралхан Бөкей: - Елімнң бір жайлауы Құрымбай саз, Жайлаған алты ай жазға сарыала қаз. Шолпандай таң алдында туып батқан, Қайтейін, о, дүние, ғұмырым аз, - деп эн салушы еді. Бір кем дүние екенін білген ғой."