Служэнне Беларусі

Вопыт самых выдатных майстроў слова пераконвае, што сапраўднага поспеху дабіваліся тыя мастакі, якія ад паэтызацыі роднага кутка ішлі да таго, што было важным для цэлай краіны, уздымаліся да вялікай праблемнасці агульналюдскага значэння. Зацыкленасць жа на местачковым абсягу думкі, правінцыянальным бачанні жыцця, несумяшчальная з вялікімі мастацкімі адкрыццямі.

З пункту гледжання практычнага чалавечага існавання такая самааддача ў творчасці, падпарадкаванасць усяго слову — вельмі цяжкая ноша, па сутнасці, — пракляцце. Але для мастацтва гэта і вялікі дар, дар дабрадзейны, бо толькі пры такой самаахвярнай мэтаімкнёнасці, пастаяннай нацэленасці на галоўнае і ствараецца нешта значнае, а тым больш — вялікае.

Чым больш жывеш на свеце, тым ясней бачыш, разумееш, як шмат у чалавечых стасунках вызначаюць непрадбачаныя акалічнасці, спрыяльны ці неспрыяльны збег абставін.