Збор твораў у 13 т. Том 10. Дзённікі (1960-1994)

Чытаю А. Разанава. Выдавецтва не хоча друкаваць яго зборнік. А дарма. Гэта — паэт цікавы.
Можа залішне ўскладнены для чытачоў, якія развучыліся думаць, і калі што не месціцца ў іх загіпсаваных сацрэалізмам галовах, б'юць у набат.
5.XII.1979

Відаць, слушна зазначыў В. Быкаў, што вельмі далёка ў нас зайшлі ў нігілізм і нешанаванне яе. /мовы/
І ён ужо не верыць, каб нешта тут можна было выправіць.

19.V.1987

А ў СП — адны паседжанні, на якіх распрацоўваем планы новых паседжанняў.

...Памёр наш швагер Браніслаў Лётка. Страшную трагедыю перажыў ён і ўся наша сям'я. У час вайны нейкі службіст загадаў Браніславу адвезці яго ў Куранец, а па дарозе іх абстралялі партызаны, здаецца, з атрада "Народный мститель" і захапілі ў палон гэтага службіста.
"Хто цябе падвозіў?" — "З Сэрвач Лётка".
Тут жа расправіліся з ім і з сем'ямі братоў Лёткаў: забілі сястру Веру і яе двухгадовага сына, забілі швагерку з дзесяцігадовым сынам.
А мужыкі іх — ацалелі. Былі ў суседняй вёсцы...

12.І.1973

Пэўна, крытыкі сяньня шумяць
Роям пчол адзьвінеўшага лета,
І ўсё радзяць дзе што назіраць,
І ўсё лечаць здаровых паэтаў.

Люты, 1938 год

Узяў Ц. Норвіда. Божа, што з ім зрабілі перакладчыкі на рускую мову!

21.VII.1994

Чытаю нарыс пра Э. Хэмінгуэя, пра яго розныя прыгоды, любоўныя гісторыі...
Ва ўсім гэтым ёсць шмат пазіравання, якім любіў займацца і наш Караткевіч.
А можа, і спроба ўцячы ад атуляючай нас нудоты.

12.VIII.1985

"Дружба народаў" дала падборку вершаў Ц. Норвіда. Людзям, выхаваным на паэзіі А. Міцкевіча, Ю. Славацкага, творчасць яго — глыбокая, наватарская, філасофская — можа здасца грувасткай, цяжкой.
Таму і ў нас яна не знайшла належнага водгуку.

29.I.1984

Упершыню пацікавіўся Максімкавымі школьнымі падручнікамі па літаратуры і падумаў, што іх мог скласці толькі нейкі ідыёт, каб адбіць у вучняў ахвоту да яе вывучэння.

24.I.1984

Падчас уборкі мабілізуем настаўнікаў, школьнікаў, медработнікаў; а на адной Нарачы можна сабраць цэлы полк лабатрасаў...