Запіскі Самсона Самасуя

Чалавек думае, а райком кіруе!

Заблытана чалавечае жыццё і няма ў ім строга акрэсленай наменклатуры.

Рэж праўду матку, покуль не зарэжаш, халеру!

Казінае племя – дзеўкі! Нуль увагі і тры кілё пагарды!

Я паслаў у цэнтральную газету артыкул: «Як размяркоўваць свой час савецкаму працаўніку, калі ён не прысутнічае на пасяджэннях, сходах, нарадах і канферэнцыях».

Кожнаму з нас перажванае нясмашна!

Прыгожа могуць гаварыць толькі непрыгожыя жанчыны.

Так страхагент запоўніў анкету:

• Пасада ... мястэчка Шапялёўка Магілеўскай акругі.
• Прозьвішча ... страшны агент, як кажуць сяляне.
• Імя ... Дзямід.
• Як па бацьку ... сын селяніна.
• Сацыяльнае пахаджэньне ... згодна тэорыі Дарвіна.
• Узрост ... 2 аршыны 7 вяршкоў.
• Пол і сямейнае палажэньне ... сямейны хлапец 50 гадоў.
• Асьвета ... Электрычнасьці няма, выключна газай.
• Прафэсія ... 64 рублі 78 капеяк.
• Пэнсія ... яшчэ не даслужыўся.
• Маёмасьць ... жонка, трое дзяцей.
• Партыйнасьць ... бязьбілетны партыец.

Гарбата – добрае зельле: і вантроба поўна і розум цэлы!

Самая дрэнная рэч, калі розуму мала, ды калі жыта засееш, а яно не зародзіць.