Гаспадар-камень

Чалавека, справу губіць не толькі фанабэрыя, але і знявага ды самазнявага.

Лепш не даесці, чым пераплакаць.

Спрачацца з мужам — ваду ў ступе таўчы. Не перавернеш на сваё.

Нідзе на свеце няма такой нацыі: тутэйшыя.

Калі ў чалавека на сэрцы лёгка, дык ён тады молада выглядае і вясёлы.

Усё за грошы купляецца, але не ўсё за грошы прадаецца.

Калі да дваццаці гадоў не вырас, да трыццаці не набраўся розуму, да сарака не жаніўся, да пяцідзесяці не разбагацеў, дык гані таго ў хлеў!

Чым гусцейшая цемра, тым далей і лепш відаць нават маленькі агеньчык.

Праўда можа забіць чалавека, калі яна не ў час выяўляецца.

Людзі сваёй шчырасці саромеюцца, з чужой — смяюцца.