Рецензия на книгу

• 

  Torvald525 апреля 2022 г.

  Васілю Зуёнку пашанцавала з гэтай кнігай. Прынамсі ён сам змог яе ўкласці і пракантраляваць выданне. А гэта бадай найлепшае яго выбранае. Гэтую кніжную серыю «Беларускі кнігазбор» заснаваў у 1996 годзе Кастусь Цвірка. «Выбраныя творы» Васіля Зуёнка выйшлі ў гэтай серыі ў 2010 годзе, далёка не самым спакойным у Беларусі, але яшчэ да ўсіх сённяшніх забурэнняў і трагедыяў.

  Прадмову, досыць аб'ёмную, да кнігі напісала літаратуразнавец Наталля Заяц. Дарэчы, у прадмове адзначаецца, што «па аб’ектыўных, далёкіх ад сфер мастацтва прычынах з 1995 года не выходзіла новых арыгінальных кніг лірыкі Васіля Зуёнка.» То бок, паэт ад самага пачатку прыходу да ўлады Лукашэнкі трапляе ў няміласць і дзяржаўнае выдавецтва «Мастацкая літаратура» для яго зачыняецца.

  Падсумоўваючы разгляд творчасці Васіля Зуёнка Наталля Заяц наступнымі словамі заканчвае прадмову: «За ўжо амаль паўвека працы ў літаратуры Васіль Зуёнак стварыў свой непаўторны мастацкі свет, па-гаспадарску, рупліва збіраючы словы, узвёў уласную — паэтычную — Сялібу. Эмацыйны эпіцэнтр яе жыцця, напэўна, знаходзіцца недзе побач з Мачулішчам, на малой радзіме пісьменніка: адтуль сілкуецца яго шматфарбная, разнастайная ў праблемна-тэматычных і жанравых адносінах творчасць.»

  Кнігу складаюць раздзел «Вершы», да якога далучана паэма «Маўчанне травы», і раздзел «Проза», які ўтрымлівае элегіі, эсэ і эцюды.

  Увогуле паэзію Васіля Зуёнка можна акрэсліць як філасофска-лірычную. Але паэт не пазбягае і сацыяльнай тэматыкі. У 1993 годзе, калі пачалася ў Беларусі паводка рознагалосся, паэт напісаў:

  Схілюся, як перад Айчынаю,
  Гляну ў крынічкіны вочы:
  Усе гаварыць навучыліся,
  Слухаць ніхто не хоча…

  А ў 1998 годзе ў вершы «Тэстамент» паэт даў параду беларусам:

  Не лезь жа, браце, у хаўрус
  З уладай безнароднай:
  Спявай жыццё, ахвярнік муз, —
  Галодны, ды свабодны!..

  А ў 2000 годзе паэт даў яшчэ адну параду адносна таго, што з'яўляецца абавязковым для здабыцця свабоды.

  Роднае слова — народа аснова:
  З ім і малы — магутны.
  Слова душу ахінае пакровам
  На скрыжаваннях пакутных.

  Варта яшчэ адзначыць адну істотную акалічнасць, гэтая кніга выйшла пры фінансавай падтрымцы пісьменніка і бізнесоўца Алеся Усені. Гэта далёка не першая кніга, якую ён падтрымаў.

  7

  127