Молитва святителя Димитрия Ростовского
Спаси́ мя, Спа́се мой, по Твое́й бла́гости, а не по мои́м дело́м! Ты хо́щеши мя спасти́, Ты ве́си, ко́им о́бразом мя спасти́: спаси́ у́бо мене́, я́ко хо́щеши, я́ко мо́жеши, я́ко ве́си: и́миже ве́си судьба́ми спаси́ мя! Аз на Тя, Го́спода моего́, наде́юся, и Твое́й во́ле Свято́й себе́ вруча́ю: твори́ со мно́ю е́же хо́щеши! Аще хо́щеши мя име́ти во све́те, бу́ди благослове́н. Аще хо́щеши мя име́ти во тме, бу́ди па́ки благослове́н. Аще отве́рзеши ми две́ри милосе́рдия Твоего́, добро́ у́бо и бла́го. Аще затвори́ши ми две́ри милосе́рдия Твоего́, благослове́н еси́, затвори́вый ми в пра́вду. Аще не погуби́ши мя со беззако́ниями мои́ми, сла́ва безме́рному милосе́рдию Твоему́. Аще погуби́ши мя со беззако́ниями мои́ми, сла́ва пра́ведному суду́ Твоему́: я́коже хо́щеши, устро́й о мне вещь!