Зваротная перспектыва

Як адрозніць мастака ад рамесніка? Вельмі проста... Мастак робіць выставу, а зайздроснікі яе забараняюць. Калі твае выставы, кнігі, часопісы, газеты, фільмы, тэлесюжэты не забаранялі, значыць ты ніколі не спрабаваў стаць творцам, ты заставаўся рамеснікам, выканаўцам чужых задум.

У мастацтве, як і ў навуцы, трэба рабіць адкрыцці. Мастак толькі тады сапраўдны творца, калі ён адкрывае новы погляд на свет.

Ёсць мастакі, якім хочацца наследаваць. Веліч мастака якраз і можна ўбачыць па колькасці ягоных прыхільнікаў, вучняў і эпігонаў.

Ёсць у школе нешта ад фермы, ад гадавальніка, ад хлява. У школе несупынна ідзе адбор, селекцыя, сартаванне. Дзеці ў школе прыпадабняюцца да жывёл на падворку для быдла.