Труны з Ікеі

А Я ХАЦЕЎ БЫ ТАК

маральны закон нада мною
і зорнае неба ўва мне

ПАДАЗРОНАЯ КАМПАНІЯ

пракурор судмэдэкспэрт
ксёндз
і гэтыя двое

ІНТРАСПЕКЦЫЯ

назіраю за сабой
і нас ужо двое
але які з нас
сапраўдны

p.s. паназіраць за сабой назіральнікам

З КІМ Я ТОЛЬКІ НЯ СПАЎ

ня спаў з маці Тэрэзай
ня спаў зь сястрой Фаўстынай
ня спаў зь Ялантай Квасьнеўскай

і калі б мусіў апавядаць
чытачкам вашага цудоўнага часопіса
ўсю праўду

гэтае інтэрвію ніколі б ня скончылася

ЧАМУ ПОСТМАДЭРНІЗМ

бо раней добрую працу не маглі атрымаць беспартыйныя
а цяпер тыя каму за 40 і хто курыць

НІЯКАЙ ІНФЛЯЦЫІ

У 1973 годзе
мой вершаваны радок
каштаваў чатырнаццаць злотых

За адзін радок
я мог чатырнаццаць разоў
схадзіць у прыбіральню

У 1982 годзе
мой вершаваны радок
каштуе дваццаць восем злотых

За адзін радок
я мог чатырнаццаць разоў
схадзіць у прыбіральню

Паэзія
не губляе сваёй вартасьці
з удзячнасьцю кажа мой верш
бабцы
на ўваходзе ў сарцір
Мы ідзе на гаўн...
прабачце, нага ў нагу

НАД ВЕРШАМ МІЛАША

Бедны хрысьціянін
глядзіць на гета

І так яму добра

АБ'ЕКТЫЎНА

Чым больш ты зрабіў
тым меней патрэбны

СУПЕР-ЭГА

Саступі яму
ён жа
слабейшы

Саступі яму
ён жа
дурнейшы

Падстаў
другую шчаку

Госпадзе
я ня маю
трэцяй шчакі

Доўга шукалі вінаватых
а яны былі ўжо даўно вядомыя