Цитаты из книги Стоглав

Аще который попъ, или діяконъ упіется котораго дня до піяна, ино ему на завтріе не служити никакожде, аще обличенъ будетъ да отлучится, аще ли не престанетъ да извержется, по священнымъ правиломъ, и о том священникомъ и діякономъ беречи на крѣпко. Ясти и пити въ славу Божію, а не въ объяденіе и піянство. Якоже самъ Христосъ рече: да не отягчаютъ сердца ваша объяденіемъ и піянствомъ и печальми житейскими. 

Бога ради Государь вели ихъ вывести, кое бы ихъ не было въ твоемъ царствѣ, се тебѣ Государю великое спасеніе, аще бѣсовская ихъ игра не будетъ.

Не написано Государь въ спискахъ о молодыхъ строехъ, которые волосаты ходятъ по Міру, коихъ бы Государь тебѣ велѣти ихъ поизвѣсти, неходили бы по міру молодыя ребята. Се есть не Бога ради скитаются, свою волю дѣютъ, а міръ соблазняютъ.

Говорити Государю о иконописцахъ, что на Москвѣ и по всѣмъ городамъ не мастерское письмо. Въ рядехъ иконы обрать, и допытатися тѣхъ иконописцевъ, и впредь имъ не велѣти иконъ писати, дондеже научатся у добрыхъ мастеровъ.

Иже за три недѣли, кромѣ Церкви, пребудетъ безъ всякія нужды, и великія напасти; аще причетникъ да извержется, аще ли мірскій человекъ да отлучится.

Азъ Петръ и Павелъ, заповѣдаемъ людемъ дѣлати пять дней въ недѣли, въ субботу же и въ недѣлю упражнятися въ Церковь, поученія ради книжнаго Благовѣрія.

Отъ святаго Воскресенія Христа Бога нашего дни, до новыя недѣли, всю недѣлю во святыхъ Церквахъ пребывати подобаетъ неоскудно, вѣрнымъ псалмы и хваленьмы и пѣсньми духовными, и веселящимися о Христѣ и празднующимъ, Божественныхъ книгъ чтеніем внимающихъ, и святымъ тайнамъ наслаждающеся, Будемъ бо сице со Христомъ воскресшимъ веселиться, да никакоже впредь лежащія дни, конная уристанія бываютъ, или инъ людскій позоръ да не дѣйствуется.

Рѣша Богоносніи Отцы церковніи учителіе, паче же инѣхъ, Златоустъ глаголетъ: яко волшебствующіе, и обаяніе творящіе, аще и святыя Троицы нарицаетъ имя  и призываетъ, аще и знаменіе честнаго Креста Христова творятъ, бѣгати подобаетъ отъ нихъ.

Правило шестьдесятъ первое и шестьдесятъ второе, святаго вселенскаго шестаго Собора Святыхъ Отецъ, возбраняетъ къ волфомъ ходити, и запрещаетъ православнымъ Христіяномъ, поганскихъ и Эллинскихъ скверныхъ обычаевъ, и надъ дѣлвами, сиречь надъ бочками, и корчагами, и васъ призывающе, и грохочуще, и протчихъ неподобныхъ дѣлъ творити.

Пятьдесятое правило Собора сего возбраняетъ играти всѣмъ, и причетникомъ, и мирскимъ человѣкомъ, зернью и шахматы и тавлѣями, и влимьями, рекше костьми, и протчими таковыми играми, пятьдесятъ же первое правило, всякое играніе возбраняетъ, и отмѣтаетъ, и причетникомъ, и простымъ людемъ.

Божественное писаніе заповѣдало есть, удалятися отъ крови и удавленины, и отъ блуда, нѣціи убо угожденія ради чревнаго, кровь коего  любо животнаго, хитростію нѣкако сотворяютъ снѣдно, еже глаголетъ колбасы, и тако кровь ядятъ. Подобно запрещаетъ таковымъ, аще убо кровь отнынѣ животнаго, каким любо образомъ ясти начнетъ, или удавлину; аще есть причетникъ, да извержится ; аще мірскій человѣкъ да отлучится.

Се азъ Кипріанъ митрополитъ Кіевскій и всея Руссіи, что есмь слышахъ яже во Псковѣ міряне судятъ поповъ, и казнятъ ихъ въ Церковныхъ вещахъ, ино то есть кромѣ Христіянскаго закона, не годится міряномъ попа, ни судити, ни казнити, ни осудити его, ни слова на него молвити.

О томъ же о постриженіи брадъ, написано въ Законѣ се: не постризайте брадъ вашихъ, себо женамъ лѣпо, мужемъ неподобно, создавый Богъ судилъ есть, Моисеови бо рече: постризало да не взыдетъ на браду вашу, себо мерзско есть предъ Богомъ.

Правило святыхъ Апостолъ сице глаголетъ: аще кто браду бріетъ, и преставится таковой, недостоитъ надъ нимъ служити ни сорокоустія пѣти, ни просвиры, ни свѣщи по немъ въ Церковь, съ невѣрными да причтется, отъ еретикъ бо се навыкоша.

Аще ли кто злословитъ родители своя, и сей отъ Бога грѣшенъ есть, и отъ людей проклятъ. Аще біетъ отца или матерь, отъ Церкви отлучитися, и смертію да умретъ. Писано бо есть; отеческа молитва сына не покорена изсушитъ, и матерня искоренитъ, а слушаяй и почитаяй родители, добро ему будетъ, и будетъ многолѣтенъ на земли.

... ни гдѣ же бо нѣсть писано, что бы не пити вина, не буди намъ таковая мудрствовати, ниже запрещати, но самъ Богъ созда, и повелѣ пити вино въ веселіе, а не піянство. Также ясти не во объяденіе, но въ сытость, и во славу Божію.

Мнозіи неразумніи человѣцы, махающе рукою по лицу своемъ творятъ крестящеся, всуе труждающеся, тому бо маханію бѣсы радуются.

Да и о иныхъ тяжкихъ винахъ, духовно бесѣдовати довлѣет: за что гнѣвъ Божій приходитъ на землю сію и всякіе казни праведнаго гнѣва Божія. Да не до конца прогнѣвается Богъ, наказуетъ милостію, и ждетъ нашего покаянія и обращенія отъ всякихъ золъ, паче же отъ блуда любодѣяннаго, прелюбодѣйства и содомства, неправеднаго суда, гордости, зависти.

Да по грѣхомъ слабость и небреженіе и нерадѣніе вниде въ міръ въ нынѣшнее время, нарицаемся Христіяне, а въ тридесять лѣтъ, и старые главы и брады брѣютъ и усы, и платье и одежи иновѣрныхъ земель носятъ, почему знати Христіянина.