Метад муаравых крэсак

на рабінах чырвоныя гронкі
гэта я святкую забойства

рукі мае занадта слабыя
ісці па зямлі
а ногі дужа ўжо брудныя
каб крочыць па небе
так з'яўляецца неабходнасць вырошчваць
крылы
ці рабіць іх
з падручнага матэрыялу

калі вочы адмаўляюцца
бачыць
я знаходжу твой голас
навобмацак

я н е м а г у к а з а ц ь
(як зручна, што "х" і "з" так блізка на
клавіятуры)

і калі вочы стануць чыстымі ад аблокаў
і калі голас лісце назад да дрэваў
уздыме
я ўпаду
як тэмпература за вокнамі
ніжэй спадара Цэльсія